Heil og sæl kæru vinir,
Í gær var öskudagur haldinn hátíðlegur venju samkvæmt í Ísaksskóla. Eftir hádegisfrímínútur komu allir sér vel fyrir inni á sal og biðu spenntir eftir skemmtiatriðinu. Að þessu sinni töfraði Einar Mikael fyrir okkur og stóð sig með mikilli prýði.
Því næst fór helmingur af börnum niður í sal að slá köttinn úr tunnunni (sem var auðvitað full af nammipokum), á meðan hinn helmingurinn fór í sína stofu með kennara. Siðan var skipst á og seinni helmingurinn sló úr annarri tunnu (líka full af nammi eðlilega).
Allt gekk vel, allir fengu nammipoka og Einar Mikael gaf öllum krökkum töfradót sem við þökkum kærlega fyrir.
Öskudagur er viðburður sem Foreldrafélag Ísaksskóla greiðir fyrir, þ.e.a.s. skemmtiatriðið og það sem tengist því að slá köttinn úr tunnunni. Í því samhengi minnum við á greiðsluseðla fyrir Foreldrafélag Ísaksskóla sem á að birtast foreldrum í heimabanka. Með skilvísri greiðslu á gjöldum getum við boðið skammlaust upp á viðburði sem þessa.
Myndir voru teknar í gríð og erg og munu þær birtast á myndasíðum skólans.
Næsti viðburður sem Foreldrafélag Ísaksskóla stendur fyrir er páskabingó – áætluð dagsetning er vikuna fyrir páska (byrjun apríl) – nánari upplýsingar síðar. Við undirstingum ykkur þó með styrki fyrir bingóið – þeir foreldrar sem geta bjargað okkur með vinninga vinsamlega hafið samband sem fyrst.
Að lokum – erfitt er að segja frá öskudegi án þess að minnast á starfsfólk Ísaksskóla. Þau áttu stóran þátt í því að gera þennan dag ógleymanlegan fyrir börnin okkar og fyrir það þökkum við einnig hjartanlega.
Takk fyrir okkur og sjáumst í páskabingói.
Bestu kveðjur – Stjórn Foreldrafélags Ísaksskóla
