Kæru nýnemar, foreldrar og forráðamenn,
Við bjóðum ykkur hjartanlega velkomin í Skóla Ísaks Jónssonar. Á þessari síðu er að finna allar helstu upplýsingar er varða skólabyrjun í Ísaksskóla.
Í upphafi skólaárs eru fimm ára börn og nýir 6-9 ára nemendur boðuð sérstaklega í skólann til að hitta kennarann sinn áður en skólinn hefst. Umsjónarkennarar boða nemendur og foreldra/forráðamenn í viðtal símleiðis um miðjan ágúst. Ef barnið byrjar á miðjum vetri er ávalt boðað í viðtal hjá umsjónarkennara og stutta skólaheimsókn áður en formleg skólaganga barnsins hefst.
Allir foreldrar/forráðamenn þurfa að fylla út skólasamning áður en skólaganga hefst.
Fyrsti skóladagur hjá 5 ára börnum. Skóladagurinn hefst kl. 8:30 og við lokum kl. 17:00 alla daga nema kl. 16:15 á föstudögum. Sólbrekka opnar kl. 7:30 á morgnana fyrir þá foreldra/forráðamen sem óska eftir því að börnin komi fyrr. Við viljum þó benda á að gott er að fara rólega af stað með viðveru. Það er mikið álag á börnin að byrja í skóla og annarri viðveru á sama tíma.
Fyrsti skóladagur hjá 6, 7, 8 og 9 ára nemendum. Skóladagurinn hefst kl. 8:30 og lýkur kl. 14:00. Sunnuhlíð (frístundarstarf 6-9 ára nemenda) tekur til starfa strax fyrsta skóladaginn. Hún er opin til kl. 17:00 alla daga, nema til kl. 16:15 á föstudögum. 6-9 ára nemendur geta komið í Sólbrekku (morgunfrístund og leikskóladeild) kl. 7:30-8:30 alla morgna óski foreldrar/forráðamenn eftir því. Morgunfrístundin er ekki boði fyrsta skóladag ársins, en eftir það er hún á sínum stað.
Frístundaheimili Ísaksskóla heitir Sunnuhlíð. Starfsfólk frístundaheimilis leiðbeinir og aðstoðar börnin í leik og starfi utan kennslustunda. Lögð er áhersla á að hvetja börnin til leikprýði og samvinnu. Í frístund eru einnig haldnar söngstundir og ýmislegt sem virkjar börnin til leiks í því sem þau hafa lært í skólanum. Nánari upplýsingar um Frístundaheimili skólans má finna hér, sem og starfsáætlun frístundar með því að smella hér. Vistunartími í frístund er skráður í skólasamning við upphaf skólagöngu. Eftir það má breyta vistunartíma hér.
Námskynningar eru haldnar fyrir foreldra/forráðamenn að hausti. Þar kynnir skólastjóri m.a starfsfólk skólans og fer yfir ýmis hagnýt atriði varðandi skólagöngu barnanna. Foreldrar fylgja síðan umsjónarkennurum í sínar stofur þar sem farið verður yfir skólastarfið framundan. Ekki er ætlast til þess að börnin mæti á þessar kynningar.
Stundatöflur og bekkjarlistar eru aðgengileg í Mentor.is. Skólinn notar Mentor kerfið til að halda utanum skólastarfið. Hér er hægt að nálgast notendahandbók fyrir Mentor.
Tómstundaframboð er kynnt fljótlega eftir skólabyrjun og er það gert með tölvupósti til forráðamanna, og birt á vefnum hér. Tómstundastarf fer alla jafna af stað upp úr miðjum september.
Ávaxtastund er daglega rétt fyrir kl. 10:00. Nemendur koma með ávöxt eða grænmeti að heiman.
Maturinn í hádeginu er frá Krúsku. Fyrsta máltíðin er strax fyrsta daginn í upphafi skólaárs. Krúska kappkostar að vera ávallt með hollan og bragðgóðan mat. Þeir nemendur sem eru í frístundinni koma með hollt og gott eftirmiðdagsnesti en 5 ára fá nónhressingu í skólanum. Mataráskrift er skráð í skólasamning við upphaf skólagöngu. Eftir það má breyta henni hér
Nemendur fá öll gögn í skólanum, bækur og ritföng. Þeir þurfa einungis að hafa meðferðis (skóla)tösku sem rúmar A4 möppustærð, tátiljur fyrir leikfimi (fást í Ástund í Austurveri) og vatnsbrúsa. Allir nemendur fá síðan plastvasa með rennilás fyrir námsgögnin.
Móttaka nemenda sem þurfa sérstakan stuðning. Í umsókn um skólavist ber foreldrum að tilgreina ef barn hefur farið í greiningu, leikskóli mælt með greiningu eða barnið fengið sérstakan stuðning í leikskóla. Upplýsingarnar eru nauðsynlegar fyrir skólastarfið og velferð barnsins. Meðferð persónuupplýsinga eru á hendi skólastjóra og er gætt fyllsta trúnaðar við meðferð þeirra. Við upphaf skólagöngu eru foreldrar upplýstir um heildarskipulag, stefnu skólans og áætlun um skipulag stuðnings við nemendur. Lögð er áhersla á að nemandi komi í heimsókn og skoði skólaumhverfið. Fagstjóri sérkennslu skólans er Fanney Hanna Valgarðsdóttir: fanney@isaksskoli.is
Sumarskóli Ísaksskóla er starfsræktur á sumrin. Hann fellur inn í 11 mánaða starf 5 ára deildar, en að auki gefst þá nemendum 6 ára bekkjum tækifæri að sækja Sumarskólann í um 6 vikur yfir sumartímann. Sumarskólinn hefst í byrjun júní, skömmu eftir skólaslit og stendur fram í lok júlí. Nánari upplýsingar um sumarskólann má finna hér.
Ef einhverjar spurningar vakna bendum við ykkur á að hafa samband við skólann í síma 553-2590 eða kíkja inn á heimasíðuna, www.isaksskoli.is.
Velkomin í Ísaksskóla!
