Kæru foreldrar/forráðamenn
Senn lýkur sumarleyfum nemenda. Starfsfólk Ísaksskóla hlakkar til að hitta þá aftur sem og nýja nemendur við skólann. Við bjóðum ykkur öll hjartanlega velkomin til samstarfs á nýju skólaári.
Áður en skólinn hefst viljum við benda á nokkur atriði sem gott er að hafa í huga við skólabyrjun.
Miðvikudagurinn 22. ágúst er fyrsti skóladagur hjá 6, 7, 8 og 9 ára nemendum. Skóladagurinn hefst kl. 8:30 og honum lýkur kl. 14:10 að venju. Sunnuhlíð (frístundarstarf 6-9 ára nemenda) tekur til starfa strax fyrsta skóladaginn. Hún er opin til kl. 17:15 alla daga, nema til kl. 16:15 á föstudögum. 6-9 ára nemendur geta komið í Sólbrekku kl. 7:30-8:30 alla morgna óski foreldrar/forráðamenn eftir því. Tómstundaframboð verður kynnt og fer af stað um miðjan september.
Fimm ára börn verða boðuð sérstaklega í skólann til að hitta kennarann sinn áður en skólinn hefst. Umsjónakennararnir munu hringja nú í vikunni og þeirri næstu og boða nemendur og foreldra/forráðamenn í viðtal. Fyrsti skóladagur 5 ára er föstudagurinn 24. ágúst. Skóladagurinn hefst kl. 8:30 og lýkur kl. 13:25. Þá tekur Sólbrekka við.
Sólbrekka (frístundastarf barna í 5 ára bekk) tekur til starfa á sama tíma og þau koma í skólann. Þar eru börnin fyrir og/eða eftir skóla allt eftir óskum foreldra. Sólbrekka opnar kl. 7:30 á morgnana og er opin til kl. 17:15 alla daga, nema til kl. 16:15 á föstudögum. Við viljum þó benda á að gott er að fara rólega af stað með viðveru í Sólbrekku, því það er mikið álag á börnin að byrja í skóla og annarri viðveru á sama tíma.
Kynningarfundir fyrir foreldra/forráðamenn verða haldnir:
Fimmtudaginn 23. ágúst kl. 17:30 fyrir foreldra/forráðamenn fimm ára barna.
Þriðjudaginn 28. ágúst kl. 17:30 fyrir foreldra/forráðamenn 6, 7, 8 og 9 ára nemenda.
Við vonumst til að sjá sem flesta á kynningarfundunum.
Eins og ávallt fá nemendur öll gögn í skólanum, bækur og ritföng. Þeir þurfa einungis að hafa meðferðis skólatösku, tátiljur fyrir leikfimi (fást í Ástund í Austurveri) og vatnsbrúsa. Þau börn sem eiga heilar teygjumöppur frá síðasta skólaári koma með þær að heiman aftur en þau sem ekki eiga nothæfar möppur fá nýjar hjá okkur.
Ávaxtastund er daglega rétt fyrir kl. 10:00. Nemendur koma með ávöxt eða grænmeti að heiman.
Maturinn í hádeginu kemur áfram frá Móður náttúru. Fyrsta máltíðin verður föstudaginn 24. ágúst daginn sem 5 ára börnin koma í skólann. Móðir náttúra kappkostar að vera ávallt með hollan og bragðgóðan mat. Þeir nemendur sem eru í frístundinni koma með hollt og gott eftirmiðdagsnesti en 5 ára fá nónhressingu.
Allir foreldrar/forráðamenn þurfa að fylla út skólasamning og kemur sérstakur póstur frá Láru á skrifstofunni þegar að hann verður kominn á vef skólans.
Ef einhverjar spurningar vakna hjá ykkur bendum við ykkur á að hafa samband við skólann í síma 553-2590 eða kíkja inn á heimasíðuna www.isaksskoli.is.
Gleðilegt nýtt skólaár,
starfsfólk Ísaksskóla
